Приказната за девојчето од Сирија: 45 часа била во урнатините покрај мртвата мајка
Десетгодишното девојче Рама Ал-Ахмед од болничкиот кревет во северозападна Сирија ја раскажа страшната приказна за тоа како била заробена 45 часа покрај нејзината мртва мајка под тешкиот бетон, некогаш дел од петкатницата каде што живееле.
Спасувачите ја извлекле Рама од урнатините заедно со неговиот шестгодишен брат Зајед и петгодишната сестра Шам, кои преживеале.
„Последното нешто на што се сеќавам беше дека трчав по скалите држејќи ги рацете на сестра ми и брат ми, а потоа целата петкатна зграда се урна над нас. Бевме заглавени на едно место, а до нас беше нашата мајка која почина“, рече малата Рама во болница во северозападниот сириски град Идлиб, кој е под контрола на бунтовниците.
Таа зборуваше со кревок глас и неколку пати заплака за време на телефонскиот разговор.
„Мајка ми умре, но јас и брат ми и сестра ми останавме заглавени. Врескавме и викавме, беше многу темно и страшно“, опиша таа со низок глас.
„Беше и многу студено“, додаде таа.
Таа рече дека се молела таа да умре пред нејзиниот брат и сестра, бидејќи не сакала да ги гледа како умираат пред нејзините очи.
„И тогаш водата дојде до нас и едвај можевме да дишеме“, додаде таа.
Водата доаѓаше од резервоар во урнатата зграда, а врнеше дожд.
„Ги туркав сестра ми и брат ми, но бевме половина во вода. Одеднаш, по многу часови, не знам колку, видов мала светлина што минува. Не можев да викам на глас бидејќи бев слаба”, рече таа.
Рама, нејзиниот брат и сестра беа спасени од Белите шлемови, сириска спасувачка група која со години оперира во земјата разурната од војна.
Групата објави видео од спасувањето.
„Можев да слушнам еден човек како ни кажува: Тука сме. Доаѓаме да ве спасиме, не плашете се“, се сеќава Рама.
На видеото објавено од Белите шлемови се гледа како волонтер се бори низ урнатините и ги отстранува со рака за да стигне до заробените деца.
Рама, неговиот брат и сестра се опоравуваат од повредите во болницата во Идлиб.
„Рама не го знае тоа, но еден од прстите и е ампутиран. Сè уште не ѝ го кажавме тоа. Доволна и е траумата. Ја изгубив сопругата, но имам среќа – сè уште имам деца“, рекол нејзиниот татко Зухеир Ахмад и додава дека другите две дечиња имале исеченици и модринки.
Ахмад во моментот на земјотресот се грижел за својот болен татко, на неколку метри од неговиот дом.
„Кога го почувствував земјотресот, побрзав и го видов целото семејство под урнатините“, рече тој. Тие беа заробени речиси 45 часа.
Невладината организација Save the Children предупреди дека „се наѕира втора хуманитарна катастрофа“ по земјотресот што во понеделникот ги погоди Турција и Сирија и однесе повеќе од 20.000 животи.
„Ситуацијата низ северозападна Сирија е најтешката криза во светот во моментов. Од загубата на членовите на семејството до домовите, недостатокот на храна или вода за пиење, верижната реакција на оваа катастрофа го погоди секое дете“, рече Кетрин Ахил, шеф за комуникации во филијалата на Save the Children во Сирија.
