Пресуди повредата на Нено: Македонија и по добра игра загуби од Естонија (ФОТО)
Ова е неуспех што двојно боли, со оглед што не само што беа загубени бодови пред своите гледачи, туку тоа го направивме во дуел со директниот конкурент за втората европска виза од нашата група, заедно со огромниот фаворит Литванија. Со нас игра и Полска, но таа е надвор од конкуренција со оглед што веќе има европски билет како еден од организаторите на следниот континентален собир.
Жолто-црвените не се посрамотија, играа повеќе од добро во најголемиот дел од средбата, што во два наврати во првото полувреме ни донесе предност со девет поени разлика (41-32). Тоа беше круна на серијата 8-0, како потврда на одличната партија на нашите момци предводени од фантастичните Ненад Димитријевиќ и Итан Хап, заедно со одличниот во овој дел од мечот, Стојан Ѓуроски. Но, противникот по второто вакво наше водство, во финишот од вториот и почетокот од третиот период постигна 11 поени во низа и направи целосен резултатски пресврт (45-43) како најава на крајниот епилог.
Нашиот отпор траеше се до финишот од претпоследната четвртина кога последен пат бевме во водство (53-51), по што Естонците со серија 9-3 повторно дојдоа до водство, кое го задржаа до самиот крај. Гостите точка на мечот ставија со седумте поени во низа кон средината на четвртиот период за единственото двоцифрено водство (72-62), што им беше олеснето бидејќи неколку минути претходно посериозна повреда заработи Димитријевиќ поради што мораше на клупата. Тој стисна заби во финишот и проба да игра и со една нога, но не успеа да направи чудо заедно со соиграчите.
Популарниот Нено со 25 поени беше најпрецизен кај Македонија, каде што неверојатно деби имаше Хап со 18 поени, 10 скока и по четири блокади и украдени топки. Вене и Коцар со по 16 поени беа најпрецизни кај Естонија.
Во првиот меч од нашата група одигран синоќа, Литванија лесно ја преслуша Полска (83-64). Македонската селекција в понеделник им гостува на Полјаците, додека Естонците ја пречекуваат литванската репрезентација.
