Препукувања по поплавите во Батинци – Арсовска и Ѓеоргиевски со меѓусебни обвинувања за негрижа
Излевањето на Маркова Река во селото Батинци, општина Студеничани, покрај материјалната штета, предизвика и политичка пресметка меѓу градоначалничката на Скопје, Данела Арсовска, и градоначалникот на општина Кисела Вода, Орце Ѓеоргиевски.
Арсовска го обвини Ѓеоргиевски за „лажен хероизам“ и негрижа, посочувајќи дека поплавата е директен резултат на тоа што локалните власти не ја спроведуваат својата надлежност – редовно чистење и одржување на каналите.
„Со превенција се спречуваат поплави, не со глумење спасител за проблемите кои сами сте ги дозволиле“, порача Арсовска, додавајќи дека Противпожарната бригада на Град Скопје и екипите на ЈП „Водовод и канализација“ се веќе на терен и активно работат на санирање на штетите.
Но, претходно, Ѓеоргиевски во објава на социјалните мрежи соопшти дека веднаш по добиената информација за излевањето, од телевизиско гостување се упатил на терен да помогне, заедно со градоначалникот на Студеничани, Азем Садику. Тој ѝ забележа на градоначалничката Арсовска дека Град Скопје во неколку наврати одбил да интервенира во расчистување на речното корито, со образложение дека немало предвидени средства.
„Временските непогоди не можеме да ги спречиме, но можеме да делуваме за да нема големи последици. Материјалното ќе го поправиме заеднички – Бог нека нѐ чува сите, тоа е најважно“, напиша Ѓеоргиевски.
Додека механизацијата работи на терен, јавноста е сведок на нов бран меѓуопштински и институционални препукувања, кои се случуваат среде реална опасност за граѓаните – уште една потврда дека климатските ризици бараат координација и навремена превенција, а не само теренски настапи и политички реакции по штетата.
