ПРЕМИЕРОТ НА СРБИЈА, МИЛОШ ВУЧЕВИЌ ПОДНЕСЕ ОСТАВКА: „Целата влада е во технички мандат, целиот кабинет паѓа“
Девет месеци по формирањето на српската влада и три месеци по уривањето на настрешница во Нови Сад, во која загинаа 15 лица и предизвика бран протести и студентски блокади, премиерот Милош Вучевиќ поднесе неотповиклива оставка.
Со оставка на премиерот завршува и мандатот на целата влада.
Вучевиќ рече дека поднесува оставка по нападот врз студентите во Нови Сад и дека имал долг разговор со српскиот претседател Александар Вучиќ, кој, додаде, има разбирање за неговите аргументи.
Вучевиќ го осуди нападот врз учениците и на повреденото девојче и посака брзо закрепнување, наведувајќи дека на нејзино барање е пуштена од болница.
Тој додаде дека е уверен оти полицијата брзо ќе го реши случајот и ќе ги фати напаѓачите.
Тој најави и дека оставка ќе поднесе и градоначалникот на Нови Сад, Милан Ѓуриќ.
„Сметаме дека објективно сме одговорни за тоа што се случи и затоа поднесуваме оставка“, рече Вучевиќ.
„Целата влада е во технички мандат, целиот кабинет паѓа“, истакна Вучевиќ, додавајќи дека ќе си ја врши работата одговорно се додека не се избере новата влада.
Тој во својот говор се осврна на длабоките поделби во општеството, осврнувајќи се пред се на состојбите во образованието.
„Она што остава длабоки последици за нашето општество е сериозна поделеност, создавање атмосфера во општеството дека се е на работ на конфликт, дека сме дошле до точка каде што учениците во училиштата се бројат за да се види кој оди на час, а којне. Апсолутно се е испланирано од странство. Не се сомневам во тоа – истакна тој.
– Должни сме да го направиме првиот чекор кон смирување на страстите, Владата да покани ректори, декани и професори, а пред се студентите, да дојдат и да разговараат за сите теми кои ги сметаат за најважни… А потоа, ова утрото кога се разбудив ја видов веста од Нови Сад дека доцна синоќа имало физичка пресметка на улица, дека е повредена една од студентите, младата Ана и дека конфликтот започнал затоа што некој повторно дошол до партиските простории на СНС, дека луѓето верувале дека треба да ја бранат и дека конфликтот на крајот завршил на друга локација.
На Ана и посакувам брзо закрепнување, добив информација дека по нејзино барање е пуштена на домашно лекување. Ова секако е неприфатливо, очекувам сторителите да бидат уапсени и да се утврди нивната кривична и правна одговорност.
Никогаш не можам да разберам многу од овие протести, блокади на протести, движења, напади врз граѓани кои мислат поинаку, напади врз студенти кои сакаат да студираат. Никогаш нема да прифатам терор врз учениците кои сакаат да одат на училиште, да ги навредуваат и понижуваат родителите кои изјавуваат дека сакаат нивното дете да оди на училиште. Тоа е незамисливо – рече тој
Вучевиќ е поранешен член на Српската радикална партија, а сега лидер на владејачката Српска напредна партија и беше назначен за премиер по парламентарните избори во декември 2023 година, чија регуларност беше оспорена од некои меѓународни организации и опозициски партии.
Во Нови Сад, родниот град на Вучевиќ, чиј градоначалник беше тој, се случи голема трагедија на 1 ноември 2024 година, кога се урна настрешница на железничка станица, при што загинаа 15 лица, а двајца беа тешко повредени.
Трагедијата предизвика протести низ целата земја кои сега станаа масовни.
Студентите повеќе од два месеци ги блокираат факултетите во Србија, барајќи одговорност за смртта на 15 лица, а институциите да почнат да работат според законот.
Само еден ден претходно, Вучевиќ беше на прес-конференција со српскиот претседател Александар Вучиќ и претседателката на парламентот Ана Брнабиќ, кога ги покани студентите и професорите на дискусија за излез од актуелната криза во земјата.
На истата прес-конференција, Вучиќ најави голема реконструкција на владата, велејќи дека очекува „да бидат сменети повеќе од 50 проценти од министрите“.
Српскиот парламент требаше да расправа за гласање доверба на владата во среда, на 29 јануари, на претходно барање на опозицијата, се вели во најавата на Ана Брнабиќ.
