Прекинат 38. Охридски пливачки маратон поради лошо време
Поради силен ветер и високи бранови, денеска во 14:30 часот беше прекинат 38. Охридски пливачки маратон. Трката е сопрена во близина на хотел „Гранит“, соопшти главниот судија Марјан Бошалевски.
„Големото невреме проследено со високи бранови предизвика проблеми кај пливачите. Констатирана е моменталната состојба на маратонците и по сублимирање на податоците ќе биде прогласен победникот. Согласно правилата, доколку временските услови не дозволуваат, по поминати две третини од патеката трката се прекинува“, изјави Бошалевски за МИА.
Во моментот на прекинот, маратонците се наоѓаа во близина на хотел „Гранит“, борејќи се со брановите.
На маратонот учествуваа 16 пливачи – 10 во машка и 6 во женска конкуренција. Тие стартуваа утрово во 10 часот од Свети Наум, а на Охридското пристаниште требаше да пристигнат околу 16 часот, по патека долга 25 километри.
Во женска конкуренција настапија Елена Лионело (Италија), Росана Гошева (Македонија), Алисја Гедриш (Полска), Милица Љубисављевиќ (Србија), Ерика Абигал Јенсен (Аргентина) и Мајте Ајлен Пука (Аргентина). Пливачката од Турција, Еда Сајин, настапот го откажа поради повреда.
Во машка конкуренција настапија Александар Илиевски, Леонид Мишевски, Петар Цеков и Лазар Поп Трајков од Македонија, Акуилес Балаудо и Матиас Дијас Хернандес од Аргентина, Италијанците Федерико Тамборино, Марко Инглима и Матео Фурлан, како и Хуго Риберио од Португалија.
Организатор на маратонот е пливачкиот клуб „Охридски бранови 2008“. Настанот се одржува под покровителство на претседателката Гордана Сиљановска-Давкова, Министерството за спорт, Пливачката асоцијација на Македонија и Општина Охрид.
Наградниот фонд изнесува 15.000 евра, а манифестацијата е дел од фестивалот „Ohrid Water Festival“.
