Прекин на огнот во Газа до Рамазан, хуманитарна помош се праќа по воздушен пат
Останува оптимизмот во разговорите за постигнување прекин на огнот во Појасот Газа кои се водат со посредство на Египет и Катар. И по крвавиот напад врз хуманитарниот конвој во кој животот го загубија над 100 палестински цивили, сè уште се бара начин за изнаоѓање договор за запирање на борбите меѓу Израел и Хамас до муслиманскиот празник Рамазан. За Вашингтон крвавиот напад на северот од Газа внесува дополнителна итност во разговорите за запирање на војната и за ослободување на израелските заложници. Оттаму велат, оти немаат индиции дека по нападот, дискусиите за прекин на војната се значително излезени од колосек, но сепак многу зависи од очекуваниот одговор на Хамас.
„Сè уште се надевам на прекин на огнот. Но, не е готово додека не заврши. Мора да има договор за тајмингот, а тие сè уште се далеку од тоа“, изјави американскиот претседател Џозеф Бајден.
А, состојбата во Појасот Газа сè уште на раб на катастрофа. Хаотичните слики на кои жителите на Газа се соочуваат со недостиг од основните прехранбени производи, недостиг од вода и лекови продолжуваат да го ужаснуваат светот. Болниците дополнително се оптоварени со ранети, по смртоносниот напад врз хуманитарниот конвој. Меѓународните организации со апел да се направи повеќе за спас на цивилите.
„Додека ви зборувам, во оваа болница се лекуваат над 200 луѓе кои беа повредени. Не смее да се дозволи да продолжат овие настани. Треба да имаме безбеден премин низ Газа за да стигнеме до луѓето на кои им е потребна хуманитарна помош. Се надеваме дека во наредните денови поголеми конвои со храна ќе влезат во Северна Газа“, вели Георгис Петропулос – раководител на канцеларијата за хуманитарни прашања.
Вашинтон испраќа пакети хуманитарна помош пуштена од воздух. Египет, Франција, Јордан, Катар и од Обединетите Арапски Емирати веќе користеа воздушен пат за доставување на помошта, но најголем дел од хуманитарната помош за Газа и натаму доаѓа преку граничниот премин Рафах со Египет.
