„ПРЕД НЕКОЕ ВРЕМЕ НЀ ЗАКЛУЧИ МЕНЕ И МАЈКА МИ ВО СТАНОТ, ГО МОЛЕВ ДОКТОРОТ ДА НЕ ГО ПУШТА“ – потресна исповед на мајката на младиот убиец од Загреб
Градоначалникот на Град Загреб, Томислав Томашевиќ, ја прогласи сабота 21 декември за Ден на жалост во градот Загреб по повод трагичниот напад врз учениците и вработените во основното училиште Пречко.
Како што пренесуваат хрватските медиуми, млад човек од 19 години околу 10 часот упаднал во училиштето Пречко и со остар предмет повредил неколку ученици, од кои едно детенце почина, а наставничка e тешко повредена.
И самиот напаѓач учел во училиштето и живеел во негова близина. По инцидентот се обидел да се самоубие, но полицијата го спречила.
Според информациите од хрватските медиуми, починатото дете има седум години, а повредени се пет деца.
Повредените ученици и наставничката се итно пренесени во болницата „Свети дух“ во Загреб.
„Примени се неколку лица со тешки телесни повреди и исеченици по телото. Женското лице има убодни рани во пределот на градниот кош и беше подложено на итен оперативен зафат. Во моментот се наоѓа во животно загрижувачка опасност“, се вели во соопштението од болницата, пренесува ХРТ.
Повредените деца се пренесени во болниците во Загреб.
„Едно од децата има седум, друго 11 години. Имаат повеќе убодни рани, но се надвор од животна опасност. Се вршат анализи со кои ќе се утврди дали на некое му е потребна операција. Детето кое со хеликоптер било пренесено во болницата во Дубрава, односно во нивниот хелиодром, е пренесено во КБЦ Загреб. Детето е надвор од животна опасност“, информираат од Клиниката за детски болести во Загреб.
На местото на настанот имаше полициско обезбедување и амбулантни возила со докторски екипи, а на училишното игралиште слета и хеликоптер.
Во Хрватска денеска е последен учебен ден од првото полугодие за основците и средношколците.
Инаку, истрагата се уште е во тек. Министерката за здравство Ирена Хрстиќ изјави дека пет лица се во болници и сите во моментов се надвор од животна опасност. Тројца ќе бидат подложени на хируршки интервенции.
– Самиот сторител е надвор од животна опасност, потврди Хрстиќ.
Инаку, медиумите пишуваат дека напаѓачот имал психички болести, а тоа го потврди денеска и министерот за внатрешни работи Давор Божиновиќ.
Шокирани сме од овие настани. 19-годишен млад човек влегол во училиштето и со остар предмет ги нападнал наставничката и учениците. Едно дете починало, додека уште тројца повредени се испратени во медицински установи. Наставничката и напаѓачот се во болница и на сите лица им е укажана лекарска помош. Сторителот е 19-годишник кој бил ученик во тоа училиште и моментално живее во близина на тоа училиште, рече министерот.
Тој додаде дека се утврдуваат околностите и динамиката на настанот. Во тек се испитувања на очевидци и други акции на полицијата, разговори, земање снимки од камери.
Насилникот бил совладан десет минути по пријавувањето на настанот, наводно побегнал во блискиот здравствен дом каде што полицијата го пронашла облеан во крв. Како што потврди министерот Божиновиќ, тој се обидел да се самоповреди со нож, па се обидел да се самоубие.
Божиновиќ рече и дека се работи за психички нестабилна личност која минатата година се обидела да се самоубие.
Напаѓачот бил облечен во црно, а некои сведоци велат дека бил маскиран. Влегол во училиштето и го нападнал момчето. Потоа со нож ги повредил него и останатите.
-Тој си нанел и почнал да си нанесува повреди, исто така со нож. Се сокрил во блиските простории на Здравствениот дом. Полицијата го спречила да се самоубие, кажа министерот.
-Тешко е да се каже дека личноста била психички урамнотежена, додаде Божиновиќ.
Министерот за образование Радован Фукс изјави дека детекторите за метал се непрактични во училиштата, бидејќи проверката би траела со часови. Ова училиште, како што рече, има и видео надзор.
-Не се работи за ученик или терористички чин. Колку што знам, училиштето било отклучено и тој влегол, рече министерот.
Мајката на напаѓачот кој утрово упадна во училиштето „Пречко“ во Загреб и избоде деца, од кои едното беше убиено, се огласи и даде детали за нејзиниот 19-годишен син.
Како што пренесува хрватски 24сата.хр, мајката и останатите членови на домаќинството од страв не спиеле ноќе, а се обиделе да му помогнат.
„Ми рекоа дека напаѓачот е мојот син. Пред скоро време ме заклучи мене и мајка ми во станот, ни ги зема мобилните телефони, па потоа заврши во болница. Го молев докторот да не го пушта бидејќи не е за пуштање“, рече таа.
