Пожарот во Богданци под контрола, нема опасност за ветерниците – екипи активно работат на терен за целосно гаснење!!
Пожарот кој вчера избувна во месноста Брдаров камен, веднаш до препумпната станица на хидросистемот Дојранско езеро, а се проширил кон Ветерниот Парк Богданци, е ставен под контрола. Во моментов нема активен пожар во непосредна близина на ветерниците.
Пожарникарите од Гевгелија, Валандово, Kавадарци и Штип, заедно со тимови од ДЗС, Национални шуми и ЈКП Богданци активно работат на терен со цел да го заобиколат пожарот од сите страни за да го изгаснат целосно.
Во таа насока РЕК Битола на Центарот за управување со кризи му стави на располагање едно целосно опремено противпожарно возило со противпожарна екипа со цел полесно да се обезбеди заштита на јавниот интерес, како и заштита на животот и имотите на граѓаните.
Пожарот избувнал во носкостеблеста шума и сува трева, бргу зафатил поголема површина и се проширил кон Ветерниот Парк Богданци. Поради тоа превентивно беа исклучени дел од ветерниците (2 групи по 4 ветрници) кои беа најблиску до пожарот и потенцијално загрозени.
Екипи на АД ЕСМ се на терен и утврдено е дека нема никакви штети на ветерниците. Исто така нема никакви сигнали или исклучувања од заштитата во трафостаницата.
По направената проверка на филтрите и јавувачите за пожар во секоја ветерница ветерниците се повторно вклучени во производниот процес.
