Пожар зафати катна зграда во Валенсија: Најмалку 13 повредени
Најмалку 13 лица се повредени во пожар што уништи 14-катница во шпанскиот град Валенсија и се прошири во соседната зграда.
За само половина час пламенот ја зафатил целата зграда која е изградена во 2008 година, фасадата била во пламен, а некои делови од зградата биле фрлени неколку метри, пренесува Ел Паис.
Локалните медиуми јавуваат дека можеби има луѓе заробени во запалената зграда, а една жена изјавила дека видела пожарникарски екипи како се обидуваат да спасат малолетник од пожарот.
Полицијата ја опколи областа за да спречи повреди и да го олесни пристигнувањето на возилата за итна помош. Пожарникарите биле повикани околу 17:30 часот по локално време и моментално 20 екипи се на терен, а поставена е и теренска болница, јавува Би-Би-Си.
Шпанскиот премиер Педро Санчез во објава на социјалните мрежи изрази солидарност со жителите на оваа зграда и им оддаде признание на припадниците на итната помош.