Повеќе од 2000 сообраќајки за три месеци во Макеоднија: Брзината и понатаму водечка причина, 22 лица го загубиле животот

Од мај до крајот на јули годинава, на територијата на Македонија се регистрирани над 2.000 сообраќајни незгоди, покажуваат податоците до кои дојде Телевизија 24. Во овој тримесечен период, животот го загубиле 22 лица.

Најчест причинител на сообраќајките е неприлагодената брзина. Статистиката на Министерството за внатрешни работи укажува дека најмногу несреќи се случиле во јули – вкупно 780, додека најмалку имало во мај, кога биле евидентирани 617.

Во незгодите не биле вклучени само македонски државјани. Во месеците мај и јуни, регистрирани се вкупно 95 сообраќајни несреќи во кои учествувале странски државјани, но ниту една од нив не завршила со фатален исход.

Телевизија 24 разговараше и со пешаци и со возачи за чувството на безбедност во сообраќајот. Дел од пешаците изјавија дека се чувствуваат сигурно, но имаше и такви кои тврдат дека не се чувствуваат безбедно. Возачите, пак, велат дека кога се зад воланот ги почитуваат сообраќајните правила, но како пешаци не секогаш се чувствуваат заштитени.

Министерот за внатрешни работи, Панче Тошковски, најави построги мерки со измените на Законот за безбедност на сообраќајот, Законот за прекршоци и Кривичниот законик. Според најавите, лицата што ќе бидат фатени како управуваат возило без возачка дозвола, под дејство на алкохол или дроги, или со екстремна брзина, ќе се соочат со трајно одземање на возилото.

Иако во изминатиот период беа поставени повеќе лежечки полицајци, како и семафори со трепкачи кои предупредуваат за крајот на зеленото светло, досегашните мерки не доведоа до значајно намалување на бројот на сообраќајки и жртви.

Според европската статистика, минатата година единствената земја од Европската Унија која не регистрирала ниту една сообраќајна несреќа со фатални последици била Финска.