Потерници за седум членови од криминалната група Дуќанџик, најмладиот е на 20 години
Македонската полиција утрово на својата веб страница објави седум потерници по членови на криминалната група Дуќанџик кои во моментов се недостапни за органите на прогонот. Тие се бараат со меѓународна потерница поради инволвирана во недозволена трговија со дрога.
Најмладиот е Шакир Бајрами кој има само 20 години, останатите се: Мухамед Чајани, Сефедин Сулејамни, Шеваљ Муареми, Дритон Ибиши, Шукри Асани и Бесим Асани.
А каде се крие Муареми? Она што веќе го знаеше јавноста го потврди и шефот на Обвинителството за гонење на организиран криминал и корупција, Ислам Абази.
„Во комуникација сме со властите од Дубаи за Шеваљ. Ќе се бара негова екстрадиција“, рече во петокот на брифинг со новинари шефот на Обвинителството за гонење на организиран криминал и корупција Ислам Абази.
Муареми, како објави КОД заминал во Дубаи со целото семејството веднаш по убиството на неговиот другар и исто така водач на групата Јетон Кривањева Жила во Шиша бар во скопската стара чаршија.
Дека Шеваљ е во Дубаи сведочат и неговите објави и фотографии на социјалните мрежи.
Второосомничениот 50-годишниот Дритон Ибиши е во Каталонија, во притвор за друго кривично дело. Ќе се бара и негова екстрадиција. Со години живее во Барселона, а неодамна бил во посета на Македонија.
И заменикот на Шеваљ кој раководел со групата во земјава, Мухамед Далипи викан Руди се бара со потерница. Најверојатно е во Косово.
Оваа група организирала две набавки и транспорти на кокаин од латиноамериканските држави до земјите од Европска унија и Македонија, а има докази за вклученост во убиства и обиди за убиства.
