Потег за почит и пример! Кој за една година донираше 2,1 милиони евра во македонски ракомет?

„Алкалоид“ е македонски фармацевтски гигант, а воедно и бизнис амбасадор на нашата земја во светот. Еден од неколкуте најпрепознатливи извозни брендови на Македонија. Компанија која лани оствари приход од над 280 милиони евра, еден од најголемите извозници и компанија што редовно ги наградува своите акционери. Нивната посветеност на ракометот е позната одамна, а од пред три години системски се фокусирани за клубскиот ракомет преку новоформираниот клуб и најмлад суперлигаш „Алкалоид“. Како што оди имаме основа да веруваме дека наскоро и овој наш ракометен клуб ќе го повтори епскиот успех на легендарниот РК „Вардар“

Македонскиот фармацевтски гигант „Алкалоид“ во 2023 година донираше вкупно 2,1 милиони евра во македонските ракометни клубови „Алкалоид“ и „Мулти Есенс“, потврдуваат официјалните финансиски извештаи на двата ракометни клуба.

Според јавно достапните финансиски извештаи поголемиот брат односно ракометниот клуб „Алкалоид“ лани од „Алкалоид“ добил вкупни донации во вредност од 1,8 милиони евра. Од тоа во тек на годината околу 41.000 евра се вложени во спортска опрема, за бруто плати и останати трошоци за вработени се платени 255.000 евра, за вложувања во спортската сала во скопска Автокоманда се вложени 354.000 евра, а за режиски трошоци се платени 324.000 евра. Најголема ставка на расходната страна се услугите по дговор на дело за што клубот на свои ракометари платил 711.000 евра.

Буџетот односно приходите кои ги добил од „Алкалоид“ истоимениот ракометен клуб во 2023 година се три пати повисоки во споредба со претходната 2022 година во која изнесувале 600.000 евра. Овие податоци се доказ за тоа колку фарамцевтскиот гигант „Алкалоид“ посветува внимание на ракометот.

Ракометниот клуб „Алкалоид“, кој е формиран во 2021 година, последната натпреварувачка сезона ја заврши на третото место. Годинава по почетокот на новата сезона во супер дербито во првото коло „Алкалоид“ го победи најпознатиот македонски ракометен клуб и двократен европски првак „Вардар“ со 33:30 на домашен терен во Автокоманда.

Тоа е втора победа на „Алкалоид“ над големиот ривал по победата во Суперкупот на Македонија.

Помалиот брат на РК „Алкалоид“ е именуван по козметичката линија на фармацевтскиот гигант „Мулти Есенс“. Тоа е екипа која претежно е составена од млади ракометари кои се потенцијал за првиот клуб.

За овој клуб лани „Алкалоид“ донираше 300.000 евра. И овој клуб успеа лани да игра во македонската Супер раометна лига што укажува на тоа дека „Алкалоид“ избрал вистински правец со тоа што има силна младинска школа која се кали во силна конкуренција.

Финансиските извештаи за двете спортски друштва се достапни на следниот линк https://www.mse.mk/mk/announcement

Повеќе детали за ракометарите на „Алкалоид“ на следниот линк https://www.rkalkaloid.mk/

Р.Ф.