ПОСКАПУВАЊА КОИ НЕ СЕ ИЗДРЖУВААТ: Земјата има инфлација од над 100 отсто

Аргентина се бори со енормно висока инфлација. 

Стапката на инфлација во Аргентина изнесува над 100 проценти, што се случи за првпат по хиперинфлацијата во државата во текот на 90-тите. Статистичката агенција на Аргентина соопшти дека стапката на инфлација е 102,5 отсто, што значи дека цените на стоките и услугите се двојно повисоки во однос на лани. Нагло се зголемуваат цените на храната и пијалаците – во февруари поскапеле за 9,8 отсто во однос на претходниот месец. Аргентинските медиуми објавија дека цената на месото скокнала за скоро 20 отсто за еден месец. Весникот Амбито објави дека неповолните временски услови, продолжениот топлотен бран и сушата сериозно се одразиле врз сточарството и земјоделството. Во септември лани имаше протести со барање да се ограничи растот на цените. Централната банка соопшти дека ќе биде издадена банкнота во нови апоени – 2.000 пезоси (околу 105 долари), што е одговор на поскапувањата. Минатото лето за еден месец беа сменети тројца министри за економија.

Меѓународниот монетарен фонд (ММФ) додели шест милијарди долари за спас на економијата. 

Илјадници луѓе во август лани се собраа во главниот град на Аргентина, Буенос Аирес, барајќи повисоки плати и бенефиции за невработени поради високата инфлација. Податоците за јули минатата година покажаа дека стапката на инфлација надмина 70 отсто на годишно ниво, што ги девалвира платите и социјалните расходи.

Од осамостојувањето од Шпанија, Аргентина банкротирала деветпати. Од нив, три банкроти се случија само во 21 век и тоа во 2001, 2014 и 2020 година.