Поскапе и членарината во џамија, во Скопје е 2500 денари, во Тетово и до 6000 денари
Во светиот месец Рамазан, муслиманските верници плаќаат членарина како и други некои верски обврски. Годинава членарината во Скопје изнесува 2500 денари. Граѓаните кои ги прашавме, велат дека оваа сума е многу висока, а за некои е во ред, објави во својот прилог ТВ 21.
-Многу е но што да правиме. Кој може плаќа, кој не…
-Види сега, за нашиот стандард е многу. За некого не е но за повеќето, да.
-Не е ништо. 2500 денари во годината не се ништо. На пример, денеска луѓето пијат по 2-3 кафиња на ден. Да ги дадат 2500 годишно во џамија, му доаѓа по 10 денари на ден.
-За некого е многу, за некого можеби не, но кога ќе споредиш за една година, да одвојуваш по 1 денар, не е ништо. Во Чаршија по 100 денари едно кафе плаќаш.
Го прашавме скопскиот муфтија, Ќенан Исмаили зошто е поскапена членарината. Исмаили вели дека презеле акција за уредување на работниот статус за секој верски работник, да му се исплаќа плата почнувајќи со висината на минималецот во државата.
-Имаме предвид дека не можеме да направиме поголем исчекор бидејќи не можат да издржат луѓето, ние ова го усвоивме на состанок, да има некаков чекор, макар и по 500 денари, со што ќе го придвижиме малку стандардот и со поддршката што ја дава муфтиството, платата на еден теолог да биде колку минималецот во државата. Значи колку што е минималецот во државата, од толку да почнува платата на еден верски работник-вели Исмаили.
Муфтијата Исмаили додава дека во Скопје се плаќа по 2500 годишно а во други градови, како Тетово, членарината се движи од 3000 до 6000 денари.
-Трошоците на џамијата се покриваат со плаќањето членарина, зависи од град до град колку е. Тетово има повисоки цени, некаде од 3000 до 6000 денари. Гостивар, 10 евра по лице. Имаме околу 16500 семејства кои плаќаат членарина на годишно ниво. Кај нас во Скопје е 2500 денари, што е отприлика околу 200 денари месечно, за одржување на џамијата-изјави Исмаили.
Како што појасни муфтијата Исмаили, доколку за трошоците на џамиите не се доволни парите од членарините, другото го покрива Муфтиството. Како што рече, оваа година платиле околу 70 илјади евра трошоци.
