ПОСЕБЕН ПЛАН ЗА СООБРАЌАЈ ВО ЗИМСКАТА СЕЗОНА ВО МАВРОВО Полицајци од Ростуше ќе се обучуваат да вршат увид при сообраќајки
Посебен план за сообраќај ќе биде изготвен за претстојната зимска сезона во Маврово. Министерот за внатрешни работи Панче Тошковски денеска при посетата на Маврово изјави дека планот ќе овозможи подобар проток на сообраќај.
– Во Полициското одделение Маврово ќе се изготви посебен план за претстојната зимска туристичка сезона, со цел овозможување подобар проток на сообраќајот, навремено управување со зголемениот број посетители и распоредување на соодветен број полициски службеници за одржување на јавниот ред и мир – изјави Тошковски при посетата на Полициското одделение Маврово, Полициското одделение Ростуше и Полициската станица за граничен надзор Жировница.
При посетата на Полициското одделение Ростуше била разгледана можноста за обука на полициски службеници за вршење увиди на сообраќајни незгоди.
– Оваа мерка ќе придонесе за намалување на времето на чекање, избегнување подолготрајни блокади на сообраќајниците и зголемување на функционалноста на системот, имајќи предвид дека досега овие увиди ги вршеа екипи од Гостивар – вели Тошковски.
Во Полициската станица за граничен надзор Жировница било отворено и прашањето за дел од просторот во рамки на станицата да биде отстапен на Општината, со цел да се обезбеди паркинг простор за жителите, како практично и рационално решение во интерес на локалната заедница.
.
