Порази на Струга и Пандевци, реми на „лавовите“ со ЦСКА, победа за Тиквеш
Во Анталија, лидерот Струга Трим Лум и актуелниот вицепрвак Академија Пандев ги загубија контролките. Стружани со 1-2 и со примен гол на крајот на мечот загубија од дански Велје, а единствен стрелец за Струга беше Фатјон Јусуфи три минути по стартот на вториот дел.
Стружани го запишаа вториот пораз во четирите досегашни мечеви, откако загубија и од Локомотив Ташкент со 1-2, а ремизираа со Кривбас 1-1, додека пред доаѓање на турскиот југ го победија Охрид со 2-1.
Академија Пандев, пак, загуби со 0-2 од украинска Зарја во третата контролка, а ова беше втор пораз на овие подготовки во Анталија, откако загубија и од Марица од Пловдив со 0-1, а го разнесоа српски Раднички Ниш со 4-1. Имаат и едно реми со Брегалница без голови пред заминување на подготовките во Турција
Македонија ЃП одигра без голови со бугарскиот гигант ЦСКА Софија во пријателскиот меч, половина година откако „лавовите“ и „армејците“ се сретнаа во квалификациите за Конференциската лига.
Тиквеш пак со гол на Александар Мишов го победи косовски Феризај во Дојран во денешната контролка. За кавадарчани ова е втора победа после убедливите 3-0 против второлигашот Слога Виница.
