Поранешниот пакистански претседател Первез Мушараф почина во Дубаи
Поранешниот пакистански претседател Первез Мушараф почина денеска во болница во Дубаи по долго боледување, пренесоа светските агенции.
Пакистанската армија и пакистанската амбасада во Обединетите Арапски Емирати ја објавија смртта на поранешниот пакистански лидер. Первез Мушараф имаше 79 години. Тој беше сменет од власта во Пакистан во 2008 година.
Командантите на пакистанските поморски, копнени и воздушни сили изразија сочувство за смртта на Мушараф.
Мушараф, поранешен генерал со четири ѕвезди, беше назначен за шеф на пакистанските копнени сили во 1998 година од Наваз Шариф, кој во тоа време беше премиер на земјата. Една година подоцна, Мушараф ја презеде власта во Пакистан со бескрвен државен удар. Во 2001 година тој се прогласи за претседател на државата, задржувајќи ја функцијата премиер и началник на копнените сили. Во 2002 година, неговиот претседателски мандат беше продолжен за пет години. Во 2007 година, Мушараф влезе во конфликт со своите соработници, кои инсистираа на разговори со опозицијата, а исто така и со Врховниот суд, кој пресуди против неговото учество на други претседателски избори. Мушараф го игнорираше ова мислење и на 6 октомври 2007 година беше реизбран за втор мандат. Но, Врховниот суд бавно го потврди резултатот од изборите и на тој начин дојде до внатрешна политичка криза во Пакистан. На 3 ноември 2007 година, Мушараф воведе вонредна состојба, го суспендираше уставот и голем број граѓански слободи. Потоа положи заклетва како претседател и се откажа од командата на копнените сили. Во февруари 2008 година, тој ја победи опозицијата на парламентарните избори, а тоа доведе до импичмент на Мушараф во април истата година. Потоа отпатува за Лондон.
Во 2013 година, Мушараф се врати во Пакистан за да се натпреварува на парламентарните избори. Но, против него беа поднесени неколку случаи. За негово апсење е распишана и потерница и против него е поднесена формална пријава. Мушараф беше ставен во домашен притвор. Во 2016 година, тој доби дозвола да ја напушти земјата на лекување, но вети дека ќе се врати за да се предаде на судските власти. Ова никогаш не се случи, а во декември 2019 година, Мушараф беше осуден на смрт од Специјалниот суд на Пакистан за предавство затоа што го укина уставот и воведе вонредна состојба во земјата во 2007 година.
Во последниве години, Мушараф живеел со Дубаи.
Во јуни 2022 година, роднините на Мушараф објавија дека тој бил примен во болница поради неизлечивата болест амилоидоза, која му беше дијагностицирана уште во 2018 година. Тоа предизвикува акумулација на ненормално изменети протеини во меѓуклеточниот простор.
