Поранешниот градоначалник на Кочани Љупчо Папазов оди во куќен притвор

Поранешниот градоначалник на Кочани, Љупчо Папазов, кој поднесе оставка по трагичниот пожар во дискотеката „Пулс“, оди во куќен притвор. Истата мерка е изречена и за уште тројца осомничени, по барање на обвинителството за замена на притворот. Меѓу нив се и поранешниот директор на Државниот пазарен инспекторат Горан Трајковски, еден инспектор и член на обезбедувањето.

Во куќен притвор се и неговите претходници на функцијата градоначалник – Ратко Димитриевски и Николчо Илијев. На поранешниот министер за економија, Крешник Бектеши, му е продолжен притворот за нови 30 дена.

Другите поранешни министри за економија, Ваљон Сарачини и Беким Незири, се исто така во куќен притвор, додека за Дритон Кучи се изречени мерки на претпазливост. Во меѓувреме, судот во Кочани ги разгледува жалбите на 12 осомничени.

Јавното обвинителство денеска демантираше дека обвинител се повлекол од случајот.

„Ниту еден јавен обвинител не се повлекол од истрагата за пожарот во Кочани поради притисоци или несогласувања со правната квалификација. Тимот постапува синхронизирано и без прекин ги презема сите потребни дејствија“, соопштија од Обвинителството.

Истрагата на кочанското обвинителство е проширена на 12 април за уште 19 лица, осомничени за тешки дела против општата сигурност. Вкупниот број осомничени досега изнесува 45 физички и три правни лица.

Во пожарот загинаа 61 лице, меѓу кои шест деца, а повредени беа 197, од кои 25 деца.