Поранешниот директор на царина Даравелски излегува од „Идризово“
По 35 дена поминати во притвор, на слобода излегува поранешниот директор на Царина, Драган Даравелски. Со оглед дека постапката за која е осуден ќе се суди одново, тој ќе биде пуштен од затворот „Идризово“.
Кривичниот суд соопшти дека решението за повторување на судењето е испратено и до затворот.
– Кривичната постапка во која некое лице е осудено во отсуство, а настапила можност повторно да му се суди во негово присуство ќе се повтори ако осудениот или неговиот бранител поднесе барање за повторување на постапката во рок од една година од денот кога осудениот дознал за пресудата со која е осуден во отсуство, се вели во дописот од Кривичниот суд.
Но, оваа одлука на Кривичниот совет за повторување на судењето во пракса ќе значи и застарување на делото за кое се гонеше Даравелски.
Поранешниот прв човек на Царина се гонеше за дело „злоупотреба на службената положба и овластување“, кое според обвинението го сторил во периодот од 1999 до 2002 година.
Кривичниот законик предвидува дека за делото максимална затворска казна може да биде 10 години. Апсолутна застареност настапува за двојно повеќе време, односно за 20 години. Тоа значи дека делото му застарело уште во текот на минатата година. Според ова, Даравелски ќе се спаси од кривичен прогон, бидејќи на повторното судење ќе треба судијата да констатира дека делото е застарено.
Ексдиректорот на Царина, Даравелски, 20 години ги помина во бегство надвор од Македонија. Во Србија доби и српско државјанство. Имаше меѓународна потерница, а беше уапсен на „Табановце“ на 10. минатиот месец
Даравелски беше осуден на 7 години затвор за злоупотреба на службената положба во вредност од 2 милиони евра, пресуда која е укината.
Тој во 2016 година беше уапсен во Белград, но Србија не го екстрадираше бидејќи тамошните власти ја прекинаа постапката поради српското државјанство на Даравелски.
