Поранешниот директор на АНБ тврди: Немало организирано следење на политичари!
Поранешниот директор на Агенцијата за национална безбедност (АНБ), Виктор Димовски, тврди дека ниту актуелниот премиер Христијан Мицкоски додека бил во опозиција, ниту поранешниот министер за внатрешни работи Оливер Спасовски, ниту поранешната обвинителка за гонење организиран криминал и корупција Вилма Русковска биле директно таргетирани од операции на АНБ или за нив биле отварани предмети. Тоа го изјави Димовски по обвинувањата на актуелното раководство на Агенцијата за злоупотреби и следење на политичари, новинари и јавни личности.
Димовски во интервју за „360 степени“ посочи дека е можно нивните имиња да се нашле во предмети доколку се среќавале со лица што биле под опсервација поради закани за националната безбедност.
„Друго е прашањето дали политичари, од власта или опозицијата, контактирале со такви лица. Ако такви контакти се случиле, обврска на оперативците било тие контакти да ги нотираат. Но тоа не значи дека се работи за организирано оперативно работење, кое подразбира целосно следење и примена на оперативно-технички мерки како што се обвинувањата во дадениот случај,“ изјави Димовски.
Тој не одговори директно дали постоеле конкретни предмети со имињата на политичарите, само рече дека не се сеќава и смета дека немало постапка на АНБ за случајот „Делчевски ниви“. Димовски побара декласификација на спорните документи за да се утврди што точно се случувало и како јавните личности завршиле во оперативни активности на агенцијата. Тој додаде дека, спротивно на изјавите на актуелното раководство дека АНБ водела истраги и открила злоупотреби, агенцијата нема надлежност за истраги туку само да го известува обвинителството за откриените случаи.
Министерот за внатрешни работи, Панче Тошковски, пак, изјави дека секој треба да води истрага во рамки на својата служба, како што е внатрешната контрола во АНБ, и дека агенцијата постапила правилно со известувањето до обвинителството и јавноста. Тој изрази верување дека во моментов нема нелегално прислушување.
„Дали во секој систем постои можност за злоупотреба? Да. Но искрено не верувам дека денеска има незаконско прислушување на новинари, јавни функционери или лица кои не можат да се поврзат со кривично дело,“ рече Тошковски за Радио Слободна Европа.
Според досега објавеното, злоупотребите со незаконско следење се откриени преку внатрешна контрола во АНБ. Димовски тврди дека новото раководство, предводено од Бојан Христовски, ги преместило вработените од одделот за внатрешна контрола на други позиции, иако законот ги штити освен ако не го прекршиле законскиот поредок, а за тоа досега нема пријави.
