ПОРАДИ ЦАРИНИТЕ: Републиканците и демократите сакаат да ја ограничат моќта на американскиот претседател
Царините на Доналд Трамп за Европската Унија(ЕУ) ги зближија демократите и републиканците, кои сакаат да ја ограничат моќта на американскиот претседател.
Во Сенатот на американскиот Конгрес е претставен закон со кој значително ќе се ограничи моќта на американскиот претседател да влијае на економската политика на оваа земја, а предлагачи се Марија Кантвел од Демократската партија и Чак Грасли од Републиканската партија.
Грасли и Кантвел се собраа за да воведат закон според кој американскиот претседател треба да дојде во Конгресот најмалку 60 дена пред воведувањето на тарифите и да објасни зошто се одлучил на тој потег.
Дополнително, американскиот претседател ќе треба да им претстави на членовите на двата дома на Конгресот анализа за тоа како овие тарифи ќе влијаат на потрошувачите и компаниите во САД.
После тоа, Конгресот би имал 60 дена да гласа за овие тарифи, а во случај да не ги одобри, американскиот претседател нема да има право да ги спроведе.
Овој закон наскоро ќе се најде во собраниска процедура на американскиот Конгрес, а особено е важно да се истакне дека предлогот е усвоен по царините на Трамп, кои според многу економски аналитичари можат да доведат до економски колапс во Америка, но и во остатокот од светот.
Трамп ги воведе тарифите користејќи ги „посебните права“ што ги има американскиот претседател, откако прогласи „криза“ и „вонредна состојба“ во економијата.
Италијанската премиерка Џорџа Мелони денеска изјави дека царините за ЕУ што денеска ги објави американскиот претседател Доналд Трамп се грешка, но дека, како што наведе, тие не се катастрофални.
Мелони за италијанската државна телевизија РАИ изјави дека влијанието на американските царини не треба да се прецени и дека одговорот на нив треба внимателно да се разгледа, пренесоа британските медиуми.
