ПОПУЛАРНИ ГРЧКИ И ТУРСКИ ТУРИСТИЧКИ МЕСТА ЌЕ БИДАТ ЗАФАТЕНИ ОД ТОПЛОТЕН БРАН – температури и до 45 степени
Маси топол воздух над северна Африка и централниот дел на Медитеранот се пробиваат кон исток, па од вторник до петок во Грција и Турција ќе предизвикаат пораст на температурите до 45 Целзиусови степени на некои места, пренесува во вторник ДПА.
Највисоки температури се очекуваат во среда и четврток, а за време на викендот треба да се намалат, прогнозира грчката метеоролошка служба.
Од вторник, училиштата во делови од земјата или ќе се затворат во 11.30 часот или ќе останат целосно затворени доколку локалните општини одлучат дека топлината е премногу висока.
За многубројните туристи кои моментално се во Атина, грчкиот Црвен крст постави штандови на централниот плоштад Синтагма и на Акропол, каде персоналот дели бесплатна вода.
На луѓето им се препорачува да избегнуваат излегување надвор во топлите попладневни часови, да пијат многу вода, да избегнуваат алкохол, да не јадат премногу и да избегнуваат интензивно вежбање на отворено.
Многу градови и општини во Грција отвораат јавни, климатизирани згради каде што може да побараат засолниште бездомниците, сиромашните и луѓето кои немаат клима уред дома.
Турската метеоролошка служба предупреди и на топлотен бран, кој особено ќе го зафати западниот дел на земјата, каде се очекуваат температури од околу 45 степени Целзиусови.
Се препорачува да се избегнува престој на отворено во периодот од 11 до 16 часот, особено за постарите, децата и хронично болните пациенти.
