Поповски за Универзална сала: Ваков објект не смееше да работи, добро е што се запали празна!
Екс директорот на Универзална сала, Душко Поповски денеска во изјава за медиумите истакна дека е добро што објектот се запалил празен и што не се урнал.
Тој додава дека ваков објект не смеел да работи.
Според него, во периодот од 2005 до 2009 година додека бил на функцијата имало проект за реконструкција и градба на овој објект, но истиот не се реализирал.
„Видно ме вознемири веста дека гори Универзална сала и веднаш дојдов овде на местото. Овој објект беше на граница на употреблива вредност во периодот додека јас бев директор, односно од 2005 до 2009 година. Ваков објект не смееше да работи. Сличен ваков објект во Бугарија изгоре за 7 минути. Мојот најголем страв беше дека ќе се случи пожар и еве се случи. Овој објект беше синоним за сите луѓе во Македонија и жалосно е дека толку беше измалтретиран објектот. Уште 2005 година кога стапив на должност имаше проект за реконтрукција и проект за доградба, но тоа не се реализира. Среќа што се запали празен, а не се урна и добро е што нема жртви“, изјави Поповски.
