🎥 ПОПЛАВЕНИ НАД 50 КУЌИ ВО РЕСЕНСКО, СЕ ИЗЛЕАЈА БОЛНСКА И ИСТОЧКА РЕКА Се следи состојбата во Ресен, Битола, Демир Хисар, Охрид, Крива Паланка
Поради обилните врнежи на подрачјето на Општина Ресен се излеаја Болнска и Источка Река во селата Царев Двор и Дрмени, при што се поплавени над 50 куќи, магацински простори, визби и земјоделско земјиште, соопшти попладнево Центарот за управувањее со кризи.
Поплави се евидентирани и кај селото Долна Бела Црква од излевање на Голема Река, чиј моментален водостој изнесува 210 сантиметри.
Ангажирани се екипи на јавните претпријатија, „Македонија пат“, ЈКП „Пролетер“, како и приватни машини – вкупно 7 пумпи за испумпување вода и повеќе багери за расчистување и интервенции. Во населбата Црквиште се користат сите расположливи пумпи за санација на поплавените објекти.
ЈП “Македонија пат“ информира дека на повеќе делници има наноси од земја, кои се расчистуваат по приоритет.
Директорот на Центарот за управување со кризи, Мухамед Али, со оглед на актуелната ситуација, ја следи состојбата од Дежурниот оперативен центар на ЦУК и е во постојана координација со градоначалниците на засегнатите општини.
Поради обилните врнежи во повеќе региони низ државата се зголемени водостоите на реките, а има и поплавени терени, подруми и земјоделски површини. На терен се ангажирани екипи на јавните претпријатија, механизација и приватни компании за испумпување вода, расчистување и интервенции, информира ЦУК.
„Состојбата се следи во сите засегнати региони: Ресен, Битола, Демир Хисар, Охрид, Крива Паланка и околината. Дежурни екипи остануваат на терен и во текот на ноќта, а Центарот за управување со кризи будно ја следи состојбата и за понатамошни интервенции“, се вели во соопштението на ЦУК.
.
