Попладне средба Мицкоски – Таравари!
Попладнево се очекува средба меѓу премиерот Христијан Мицкоски и министерот за здравство и претседател на едното крило на Алијанса за Албанците, Арбен Таравари.
Како што порача Мицкоски, средбата е за натамошно функционирање на Таравари во Владата.
„На средбата јасно сакам да слушнам став дали е точно дека има договор помеѓу партијата на Таравари и ДУИ дека во најмалку пет или шест општини, да не ги шпекулирам имињата, каде што тој ќе извади кандидати, ДУИ нема да има свои кандидати за градоначалници што прво значи себепонижување, како политичка партија, а второ дека тивко ќе го поддржува. Тоа за мене како претседател на Владата е неприфатливо“, изјави Мицкоски.
Таравари пак денеска потврди дека ќе се сретне со Мицкоски, но порача ека остануваат на одлуката донесена на Претседателството на партијата да одат со посебни советнички листи на претстојните локални избори, но дека ќе го слушне и ставот на премиерот по што ќе проценат како партија како ќе продолжат понатаму.
„Тоа што ние сме го поминале на Претседателство дека Алијанса за Албанците ќе има посебни советнички листи и најверојатно сопствени кандидати за градоначалници во општините каде излегуваме. Така што ќе го слушнеме и премиерот и потоа ќе процениме како продолжуваме понатаму“, изјави Таравари.
