Понеделникот дошол на работа, вторникот заминал на одмот новиот директор на Националната галерија
Вработените во Националната галерија на Македонија реагираат остро на изборот на новиот директор Али Синани, сликар од Гостивар, кој според нив нема ниту искуство, ниту познавање од музејската дејност, што ја оценуваат како клучна за раководење со институцијата. Иако не сакаат да зборуваат пред камера, во соопштение до јавноста побараа Министерството за култура и туризам да ја поништи одлуката и да спроведе нова, транспарентна постапка.
Според нив, Синани ниту соработувал со галеријата, ниту со други сродни институции, а неговиот прв работен ден бил, како што велат, алармантен. Тој побарал службено возило, назначил заменик-директор и веднаш заминал на одмор – иако таа функција не постои во статутот на институцијата. Дополнително, не прецизирал за што точно е неговиот докторски труд, кој го одбранил во Нови Пазар, и покажал нејаснотии околу основните одговорности на директорската функција.
Синани, кој долги години живеел и работел во Швајцарија, изразил желба да донесе странски уметници во галеријата, но вработените го информирале дека за тоа одлучува институцијата преку повеќе тела.
„Изборот на лице без стручност, без основни познавања за заштита и конзервација, го доведува во прашање целокупното работење со колекцијата од над 3.300 уметнички дела и управувањето со четирите објекти со статус на културно наследство: Даут-пашин амам, Чифте амам, Спомен куќата на Лазар Личеноски и Мала станица“, стои во реакцијата на вработените.
И тројцата противкандидати на Синани побарале од Министерството увид во целата конкурсна документација. Од Синдикатот за култура на Република Македонија (СКРМ) велат дека ситуацијата е идентична со онаа од март годинава, кога реагирале за изборот на директор во Македонската филхармонија.
„Доколку министерот навистина сака силни културни институции, тогаш мора да разбере дека директорите не смеат да се избираат врз основа на политичка или етничка припадност, туку според стручност, визија и искрена посветеност на културата“, порачаа од СКРМ.
Од Министерството за култура и туризам засега немаат дадено коментар по овие реакции.
