Полицијата ќе казни родители на 13 малолетници по полноќ затекнати во казина и обложувалници

Доцна синоќа, од извршени контроли во 22 спортски обложувалници, 10 казина и еден угостителски објект, како и контрола на парковите во централното градско подрачје на Прилеп, Битола и Скопје, затекнати биле 13 малолетници без надзор на родител после 24 часот, информира денеска Министерството за внатрешни работи.

„Малолетниците биле предадени на нивните родители, по што ќе следат соодветни поднесоци“, велат оттаму.

Оваа акција е дел од проектот „Безбедно лето 2023“, во која полициски службеници контролираат присуство на малолетни лица во спортски обложувалници, казина и на јавни простори после полноќ.

Од МВР информираат и дека во Битола ноќеска околу 1 часот по полноќ, кај „Јени Џамија“ биле затекнати лицата З.И., Ѓ.М., Љ.М. и С.Џ, сите од Битола, кои што непристојно се однесувале на јавно место и за нив ќе има казни.

„Исто така, во угостителски објекти на подрачјето на Битола со инструмент фонометар била вршена проверка на јачината на бучавата, при што бил констатиран прекршок во угостителски објект во централното градско подрачје и ќе следува соодветен поднесок. На 22 јули, ваква контрола била извршена од полициски службеници на СВР Скопје, во угостителски објекти и казина на подрачјето на Центар, Кисела Вода и Аеродром, при што извршени се прегледи на 20 лица, а констатиран е еден прекршок од Законот за приватно обезбедување“, информираат во МВР.