Полицијата целосно мобилизирана по вооружениот инцидент во Тетово
Директорот на Бирото за јавна безбедност (БЈБ), Александар Јанев, денеска во СВР Тетово одржа средба со раководството на полицијата, на која беа разгледани сите околности и преземените мерки по вчерашниот вооружен инцидент, во кој загина едно лице, а четворица беа повредени.
„Сакам граѓаните на Тетово и регионот да знаат дека полицијата е целосно мобилизирана и посветена. Се преземаат активности за да се гарантира и испорача безбедноста. Нема да дозволиме стравот и насилството на поединци да ја нарушат секојдневната сигурност и мирот во заедницата,“ изјави Јанев.
Тој порача дека сторителите и сите кои мислат дека со оружје можат да решаваат спорови ќе бидат пронајдени, изведени пред лицето на правдата и санкционирани. Според него, во функција се ставени сите потребни полициски служби за фаќање на сите инволвирани во инцидентот.
„Ги повикувам сите граѓани на Тетово и насекаде низ државата да соработуваат со полицијата, да пријавуваат информации и заедно да изградиме средина во која нема место за криминал и насилство. Само заедно можеме да се спротивставиме на поединците и групите кои не споделуваат исти вредности со нас чесните,“ истакна Јанев, додавајќи дека Македонија и граѓаните заслужуваат мир и спокој, а полицијата е тука да го обезбеди тоа.
