Подгответе готовина за три дена, банките и картичките може да не работат – предупредување за граѓаните на ЕУ
Централната банка на Холандија упати предупредување до граѓаните: секое домаќинство треба да има парична резерва најмалку три дена, во случај на итност.
Се препорачува да се задржат најмалку 70 евра по возрасен и 30 евра по дете во цврста валута за покривање на основните трошоци доколку престанат да работат системите за електронско плаќање.
Една од главните причини за ваквото предупредување е зголемувањето на заканата од сајбер напади, кои стануваат се поверојатни поради напнатата геополитичка ситуација, пишува Politico.
Примерот од Шпанија покажа колку се ранливи
Во април, прекинот на струја во Шпанија и Португалија предизвика сериозни, иако краткотрајни, проблеми со плаќањето – показател за тоа колку модерното општество е зависно од дигиталните технологии. Во такви моменти единственото решение може да биде готовината.
Холандската централна банка препорачува да имате доволно готовина за основни трошоци за три дена – како што се вода, храна, лекови и транспорт.
Совети и за трговците: Подгответе резервни начини на плаќање
И банкарите не ги заборавија трговците – им се советува да овозможат алтернативни начини на плаќање, како што се QR кодовите, во случај терминалите на картичките да не работат.
Овие препораки се дел од пошироката стратегија на Европската комисија за вонредни ситуации, објавена во март. Според овој план, на граѓаните им се советува да имаат залихи со храна три дена, за да ги обезбедат основните потреби во случај на војна, елементарни непогоди или други кризи.
