ПОД ЛУПА ПРЕДМЕТИТЕ НА СУДИЈАТА ШТО СОЅИДА 350.000 ЕВРА ВО ЅИД Проверени поголем дел од случаите на кои работел Ѓоко Ристов
Претседателот на Судски совет Александар Камбовски денеска изјави дека Советот веќе извршил контрола на дел од предметите во кои постапувал апелацискиот судија Ѓоко Ристов против кого е покрената кривична пријава поради постоење на основано сомнение за сторени кривични дела „противправно стекнување и прикривање имот“ и „перење пари и други приноси од казниво дело“.
– Судскиот совет во рамки на планот на неговата работа ќе има проверки во Апелацискиот суд, не само за конкретниот судија кој го споменавте, туку за работата на сите судии. Беше извршена контрола на дел од предметите во кои постапувал судијата кој го споменавте, но во моментов немам податоци да ви изнесам во смисла дали е детектирано некој пропуст или не, бидејќи комисијата се уште ги разгледува предметите. Да, да. Конкретни предмети беа посочени во таа претставка, рече Камбовски по конференцијата „Јакнење на ефикасноста и независноста на судството во Македонија“.
Тој очекува неделава да биде готов извештајот од комисијата која ја врши проверката на предметите што ги водел Ристов.
– Па не беа многу, шест или седум предмети беа. Претставката ја водевме како анонимна. Беше потпишана од група вработени, стручни соработници и советници на Апелацискиот суд Скопје, без потпис, без имиња, тоа според законот се води како анонимна. Меѓутоа решивме да формираме група за да ги провериме тие предмети, а во меѓувреме ни стигна демант исто од група на вработени, стручни соработници дека не ја поднеле тие таа претставка. Исто таа е без имиња и презимиња, но на оваа втората имаат ставено потпис. И двете ги цениме како анонимни. Неделава треба да се готови, бидејќи станува збор, како што ви кажав, за пет или шест предмети. Не се голем број предмети – рече тој.
Камбовски најави дека во најскоро време ќе се проверува целокупната работа на Апелацискиот суд Скопје.
Во однос на случајот со новинарката од Тетово Лиридона Вејсели која беше казнета со 700 евра за кривично дело „злоупотреба на лични податоци“ од Основниот суд во Тетово, Камбовски нагласи дека станува збор за постапка која е сѐ уште во тек и во моментот кога Судски совет ќе процени дека треба да интервенира, ќе го направи тоа.
.
