Почна судењето на полицајците поврзано со пожарот во „Пулс“ – внесувале неточни податоци за константираните неправилности за дискотеката да продолжи со работа

Пред Основниот кривичен суд во Скопје денеска започна судска постапка против тројца полициски службеници од Кочани, во предмет поврзан со настани околу работењето на дискотеката „Пулс“.

Обвинителката од Обвинителство за гонење на организиран криминал и корупција поднесе обвинителен предлог против Кире Богатинов, Горан Лазаров и Александар Темелков. Постапката ќе се води по скратена постапка.

Според обвинителниот предлог, во периодот од 07.10.2023 до 07.02.2024 година, инспекторите Богатинов и Лазаров не постапиле согласно анекс-планот за акциска контрола при изготвувањето на записници од извршена контрола. Иако констатирале нарушување на јавниот ред и мир, во документацијата внеле неточни податоци за правниот субјект и одговорното лице поврзано со објектот.

Во однос на Темелков, како командир на Полициската станица Кочани, се наведува дека при одобрување барања за прекршочна постапка во 2024 година потпишал и поднел барања до надлежен суд против правно лице и лице кое, според обвинението, не било одговорно лице на клубот.

Според наводите, при контрола не била побарана лиценца за работа, а со внесување на неточни податоци се овозможило непречено функционирање на објектот. На обвинетите им се става на товар кривичното дело „Злоупотреба на службената положба и овластување“.

Судската постапка е во тек, а следното рочиште е закажано за 18 март. Во меѓувреме, најавени се и одделни судења поврзани со истиот предмет.

ФОТО: СДК.МК