Почна сезоната на крлежи – еве како да се заштитите од опасностите што ги носат

Со доаѓањето на потоплите денови и почетокот на пролетта, во Македонија се зголемува и бројот на случаи на каснување од крлежи. Овие мали паразити стануваат особено активни од април до октомври, претежно во тревнати, шумски и влажни средини. Освен што се непријатни, крлежите можат да пренесат сериозни заболувања, меѓу кои и лајмската болест.

Од Институтот за јавно здравје предупредуваат дека ризикот од инфицирање со болести што ги пренесуваат крлежите не е за потценување. Затоа апелираат граѓаните да бидат претпазливи при престој во природа, особено во региони каде тревата не е редовно косена или има поголема влажност.

Како да се заштитите:

✅ Носете светла облека со долги ракави и панталони кога одите во природа
✅ Заштетете го вратот и глуждовите – крлежите најчесто се закачуваат токму таму
✅ Користете репеленти кои се препорачани за заштита од инсекти
✅ По секое престојување на отворено, прегледајте го телото, особено пазувите, зад ушите, препоните и зад колената
✅ Прегледајте ги и домашните миленици – крлежите често ги користат како носители

Што ако ве касне крлеж?
Во случај на каснување, важно е крлежот да се отстрани што е можно побрзо и правилно, без да се стисне или превитка неговото тело, бидејќи така може да се зголеми ризикот од инфекција. Најдобро е постапката да ја изврши медицинско лице. По вадењето, местото треба да се дезинфицира, а наредните неколку недели да се следи за симптоми како температура, црвенило или осип.

Во случај на сомнеж за компликации, веднаш побарајте медицинска помош.

Лекарите потсетуваат дека најдобра превенција е свесноста и вниманието – со неколку едноставни мерки, ризикот од зараза може значително да се намали.