Почина Тихомир Јанчовски – поет, писател и преведувач
Денеска македонската литература загуби еден од своите значајни творци – Тихомир Јанчовски, поет, писател и преведувач.
Неговата смрт беше објавена од семејството на социјалните мрежи, кое напиша: „Нема веќе заеднички слики од славата. Нема веќе ништо, не напушти. Тихо го нема. Си отиде. Знам колку сте многу што го сакавте. Ќе споделиме како ќе се простиме понатаму“.
Јанчовски е роден во 1967 година во Скопје. Дипломирал општа и компаративна книжевност на Универзитетот „Св. Кирил и Методиј“ во 1991 година, а специјализирал на катедрата за Средновековни студии на Централно Европскиот Универзитет во Будимпешта. Во 2010 година магистрирал современа историја на УКИМ. Неговата творечка активност опфаќаше поезија, преводи и медиевистика, а активно се изразуваше и во театарската уметност. Во 2024 година, заедно со Бранислав Николов, го создаде поетскиот перформанс „Волкот на љубовта“.
Зад Јанчовски остануваат над триесет книги, меѓу кои поезија, романи, преводи и една книга историја. Избори од неговата поезија се преведувани и објавувани во различни литературни списанија и антологии, а има и четири целосно преведени книги на други јазици. Творбите на Јанчовски се преведувани на англиски, француски, словачки, хрватски, албански, босански, грчки, германски, српски, полски, грузиски, персиски и италијански јазик.
Со неговата смрт, македонската книжевна сцена губи еден значаен глас кој остави богат литерарен и културен белег.
