Почина Костадинка Палазова Ѓорѓиоска – еден од најсилните гласови на македонската изворна песна
Македонската музичка сцена изгуби едно од своите најпрепознатливи и најавтентични имиња. По кратко боледување, во Гостивар почина Костадинка Палазова Ѓорѓиоска – доајенот на македонската изворна песна и еден од најпосветените чувари на егејското музичко наследство. Веста за нејзината смрт ја соопшти нејзиното семејство преку социјалните мрежи.
Палазова остана запаметена како исклучителен интерпретатор на безвременски егејски песни, меѓу кои и „Сношти отидех џанам“, со кои остави длабока трага во македонскиот фолклор. Нејзиниот музички пат започна во популарната емисија „Вие пред микрофон“, каде што со изведбата на песната „Врни се, врни, либе Мариче“ ја освои првата награда и ја најави својата долга и плодна кариера.
Од 1960-тите години, Костадинка Палазова активно настапуваше и снимаше, градејќи препознатлив стил и оставајќи зад себе богат музички опус. Родена е во 1939 година во кукушкото село Сехово, од каде што животниот пат ја одвел најпрво во Гевгелија, а потоа и во Гаково, Војводина, каде што го завршила третото одделение. По сопствена желба се вратила во Вардарска Македонија и се населила во селото Зубовце, во гостиварскиот регион, каде што живееше со децении.
Палазова е особено позната и по песните посветени на Гоце Делчев и војводите од кукушкиот крај. Во својата кариера сними околу 40 песни, меѓу кои и авторски дела како „Филка мома моле бога“.
Настапувала заедно со најголемите имиња на македонскиот музички фолклор – Васка Илиева, Есма Реџепова и Кочо Петровски. За својот долгогодишен придонес ја доби наградата за животно дело на фестивалот „Роса“, по повод 50 години музичко творештво.
Во 2016 година, во Гостивар беше организиран голем велигденски концерт во нејзина чест, како симболично признание за нејзиниот огромен придонес во зачувувањето и афирмацијата на македонската изворна песна. Со заминувањето на Костадинка Палазова Ѓорѓиоска, македонската култура изгуби глас што ќе остане трајно врежан во колективната меморија.
