Почина гибонката Софи во скопската Зоолошка градина
Скопската Зоолошка градина соопшти дека на седумгодишна возраст почина гибонката Софи.
Од институцијата информираа дека пред околу 12 дена кај животното се појавиле симптоми на малаксаност и потешкотии во движењето. Веднаш била вклучена терапија и извршени лабораториски испитувања од страна на стручен ветеринарен тим.
И покрај секојдневното следење и надежите за подобрување, во неделата состојбата нагло се влошила. Иако биле преземени мерки за реанимација, Софи не издржала.
По направените анализи на Факултетот за ветеринарна медицина, утврдено е дека животното било позитивно на Mycobacterium tuberculosis complex (MTBC), преку PCR метода на Институтот за ветеринарна медицина.
Од Зоолошката градина велат дека веднаш е известена Агенцијата за храна и ветеринарство, а во живеалиштето на гибоните се извршени мерки за дезинфекција и поставени дезинфекциски бариери. Просторот е изолиран од другите животни и ќе се направат дополнителни испитувања кај останатите единки од групата.
„Вакви случаи на заболување кај животни се појавуваат во зоолошки градини ширум светот и ова не е изолиран случај само во Скопје“, нагласуваат од Зоолошката.
Тие додаваат дека Софи била меѓу најактивните гибони, постојано весела и омилена и за вработените и за посетителите. „Нејзиното заминување е голем шок за сите нас. Направивме сè што можевме, но како и кај луѓето, понекогаш болеста не може да се спречи,“ велат од Зоолошката градина.
