По Велигден, пратениците ќе се вратат на работа в среда
По Велигденските празници, пратениците в среда треба да се вратат на работните обврски, а првата наредна пленарна седница, според веб-страницата на Собранието, е закажана за 19-ти април, а до крајот на месецот има закажано само уште една седница на 27-ми април која е посветена на пратенички прашања.
На дневен ред на 111-та седница, која треба да се одржи в среда, се 33 точки меѓу кои предлог-одлуки за измена на одлуките за избор на претседател и членови на комисиите на Собранието, Комисијата за избори и именувања, Комитетот за односи меѓу заедниците и на Националниот совет за евроинтеграции.
Пратениците треба да ги разгледаат и Предлог-дополнувањата на Законот за возила, Предлог-измените на Законот за Управата за јавни приходи и на Законот за интероперабилност во железничкиот систем.
На оваа пленарна седница се и Предлог-измените на Изборниот законик, поднесени од „Левица“, како и две предлог-измени на Законот за субвенциониран студентски оброк од кои едните поднесени од пратеници од СДСМ, а другите од пратеници од ВМРО-ДПМНЕ.
