ПО УЈП И ЦАРИНА, „БЛЕСНАА“ И ДРЖАВНИ ПАТИШТА – од патарините во јули се слеале 7,65 милиони евра, повеќе од лани
По УЈП и Царина, и ЈП Државни патишта наплатиле повеќе пари од патарините во земјава.
Премиерот Христијан Мицкоски објави за зголемување на наплатата кај патарините во земјава во јули годинава. За тоа го известил новиот директор на ЈПДП, Коце Трајановски.
Односно, во јули се наплатени патарини на сума од 7,65 милиони евра, што е за 260 илјади евра повеќе од истиот период лани.
„Нормализирањето на состојбите во државата значи домаќинско работење, базирано на чесност и принципи. Затекнавме држава во хаос, се бориме да направиме ред и доследност.
Директорот на Јавното претпријатие за државни патишта, Коце Трајановски ме извести дека на наплатните рампи во Јули 2024 година има промет од 470.194.563 денари што е повеќе за цели 16.071.251 денари, споредено со истиот период лани.
Овие пари постоеле и минатата година, само разликата е што не завршувале во касата на државата, каде сега од тие пари градиме градинки, училишта, патишта.
Инвестираме во болници, нови работни места.
Разликата е во тоа што се работи домаќински и одговорно. Опозицијата води политика на ситни страсти и со целосна безидејност критикува колку да критикува, но тоа нема да не поколеба да го поправиме тоа што тие го расипаа. Исполнуваме за секој еден човек. Државата на народот“, пишува премиерот Мицкоски во својата објава на фејсбук.
