По стечајот: Витанов најавува нов бизнис модел и апликација
„Мисијата останува иста, само патеката се менува. Јас сум со вас и пред вас – и нема да ве поведам таму каде што сам не би одел“ – им порача Зоран Витанов на членовите на Лајконет Македонија. Во подолга порака испратена преку Вибер, тој објасни дека веќе се работи на создавање одржлив, етички и профитабилен бизнис модел „кој повторно ќе ни овозможи да работиме со чиста совест и гордост во идејата: здружена заедница на трговци и купувачи“. Воедно, повика на меѓусебна солидарност и избегнување обвинувања, со предлог да се разгледа можноста за заедничка постапка за заштита на „сите маркетери“, пренесе порталот Пари.мк.
Откако минатата недела странските медиуми објавија дека стечајот на MyWorld International AG е неизбежен, вниманието се насочи и кон Витанов. Иако Мај Ворлд Македонија е во сопственост на Радован Витошевиќ, Витанов ја предводи Лајконет Македонија и долги години е претставник на Лајконет Аустриа ГмбХ, компанија која исто така е засегната од стечајната постапка.
Од порталот Пари.мк се обиделе да стапат во контакт и со Витошевиќ и со Витанов, но одговор добиле само од Витанов, кој изјави дека е оштетен и најави покренување на соодветна правна постапка.
Во пораката до членовите, Витанов посочил дека тековните проблеми се резултат на лошо менаџирање, но ги охрабрил да останат трпеливи и да не се откажуваат, бидејќи наскоро ќе биде достапна нова апликација со потенцијал за профитабилност.
Тој нагласил дека веќе собира понуди од софтверски компании кои би можеле да ја развијат новата апликација. „Нашиот тим го изгради овој бизнис. Зошто да не биде и бизнисот наш?“ – заврши Витанов во пораката до корисниците.
