По речиси 19 години, Атлетико ја победи Барселона како гостин (ВИДЕО)

Атлетико славеше со 2-1 на Монжуик и првпат по февруари 2006 година ја победи Барса како гостин, сметајќи ги сите натпреварувања. Воедно, ова е и прва победа на Диего Симеоне против каталонскиот тим на гостински терен откако е тренер на Атлетико и по 17 меча во кои не успеа да дојде до триумф.

Каталонскиот тим беше многу подобар противник вечерва, но бадијала кога повторно не го искористи тоа и остана со само една победа во последните седум кола од шпанското првенство. Во првото полувреме создаде 3-4 големи шанси за гол, па погодокот на Педри во 30. минута дојде како круна на таквата игра. Во воведните 45 минути Атлетико не упати ниеден удар кон голот на Барселона, а само неколку пати успеа да го помине центарот на теренот. На стартот од вториот дел Фермин Лопез имаше зицер за можеби да ги реши, но Облак го одбрани неговиот удар.

Тоа се покажа исклучително важен момент на натпреварот затоа што неколку минути подоцна Де Пол успеа да го израмни резултатот и да внесе неизвесност во последниот половина час. Барселона повторно доминираше, создаде шанси, но пак не ги искористи, а казната за тоа стигна во 96. минута. Молина центрираше од десната страна, двајца фудбалери на Барселона ја промашија топката и таа дојде до Сорлот кој од неколку метри го совлада Пења.

Ова е седма победа по ред за Атлетико кој сигурно ќе ја заврши годината на челната позиција на табелата и ќе ја задржи предноста пред Реал. Од друга страна, Барса го претрпе третиот пораз во низа на домашен терен и од сигурен лидер пред еден месец, можно е утре да падне на третата позиција на крајот од првата половина на првенството.