По долга пауза: Скопје ќе добие „Луна парк“, тендерот ќе се распише следната недела
Градоначалникот на Град Скопје, Орце Ѓорѓиевски, на првата седница на Координативното тело на градоначалници најави дека проектот „Луна парк“ конечно влегува во фаза на реализација. По повеќегодишни застои, во текот на следната недела ќе биде распишан тендерот за изградба на новиот забавен парк – проект кој, како што нагласи, ќе биде изработен по највисоки стандарди и ќе претставува нов центар за забава во главниот град.
Според Ѓорѓиевски, повеќе генерации скопјани пораснале без можност да уживаат во модерна верзија на Луна паркот. „Децата на Скопје пораснаа без тој простор, неколку генерации живееја со ветувања. Ако претходните тоа не го направија, ние сме генерацијата која мора да го направи,“ рече тој. Градоначалникот увери дека до јуни 2027 година Скопје ќе има функционален Луна парк и најави брзо започнување на градежните активности кои ќе го променат изгледот на делот од градот каде ќе се изгради паркот.
Ѓорѓиевски говореше и за состојбите во градските претпријатија, посочувајќи дека поради нефункционалност во минатото, граѓаните се соочувале со хаос во јавниот превоз и комуналните услуги. Според него, состојбите се постепено стабилизираат: исплатени се здравствените и пензиските придонеси на вработените во „Паркови и зеленило“ и „Комунална хигиена“, а целосно порамнување на неисплатените плати се очекува во јануари.
На прес-конференцијата градоначалникот ги повтори приоритетните инфраструктурни проекти, дел од кои се во тек на тендерска процедура, а дел наскоро ќе започнат. „Решавањето на сообраќајниот хаос не е процес преку ноќ. Потребни се нови клучки, проширување на булевари и реформа во јавниот транспорт,“ изјави тој. Во оваа насока, се очекува и набавка на нови автобуси со поддршка од Владата.
Во однос на проектот за воведување на БРТ-системот, Ѓорѓиевски го оцени како „сериозно добар“ и потврди дека, по серија разговори со Владата, процесот е одблокиран. „Се надевам дека следната година ќе распишеме постапка и ќе почнеме со реализација,“ додаде тој.
Градоначалникот се осврна и на статусот на Скопје како Европска престолнина на културата 2028, нагласувајќи дека опасноста од губење на титулата е елиминирана по средбите во Брисел. „Тоа е брак што не може да се раскине,“ рече Ѓорѓиевски, цитирајќи еден од европските претставници.
Во однос на дивоградбите, тој повтори дека Град Скопје нема градежна инспекција, но делува во рамки на надлежностите: отстранети се диви тезги и нелегални монтажни објекти на плоштадот. „Сѐ што беше грда слика веќе се нормализира. Апелирам и до колегите во општините секој да постапува согласно законот. Ќе им ја обезбедам целата механизација и поддршка од градските претпријатија,“ порача Ѓорѓиевски.
Со распишувањето на тендерот за „Луна парк“, градот најавува долгочекуван пресврт – проект кој ќе ги надмине границите на празни политички ветувања и ќе се претвори во реалност за скопјани и нивните деца.
