ПО ДЕВЕТМЕСЕЧНО ДИРЕКТОРУВАЊЕ СО НАЈГОЛЕМАТА ВИНАРСКА ВИЗБА – Бранка Славеска повеќе нема да раководи со „Тиквеш“
Надзорниот одбор на винарската визба „Тиквеш“ донел одлука за спогодбено прекинување на функцијата на генералната директорка Бранка Славеска, дознава Фактор.
Ова се случува после деветмесечно директорување со компанијата од Славеска, со оглед што нејзината функција стартуваше од почетокот на годинава.
Оваа информација компанијата многу бргу ќе ја објави и преку Македонската берза за долгорочни хартии од вредност.
Инаку, се до изборот на нов генерален директор, оваа функција ќе ја извршува претседателот на Управниот одбор на компанијата, Светозар Јаневски.
Нашите сознанија говорат дека Славеска го завршува ангажманот од лични семејни причини, и својата кариера ќе ја продолжи во странство.
Кога Славеска беше промовирана за директорка на „Тиквеш“, беше нагласено дека таа има 25 годишно искуствио во индустријата на пијалоци.
„Од 01.01.2024 година функцијата генерален директор на Винарска визба „Тиквеш“ ќе ја преземе Бранка Славеска. Бранка Славеска има 25-годишно професионално искуство во индустријата за пијалаци, работејќи за реномирани домашни и мултинационални компании. Како искусен менаџер, Бранка Славеска има постигнато одлични резултати во својата работа, успешно раководејќи тимови и процеси и унапредувајќи ги деловните перформанси и влијанието во доменот на ЕСГ стандардите. Преку нејзиниот ангажман, компаниите за кои работела постигнале развој и раст на нови пазари во различни региони на меѓународно ниво“, се нагласуваше во известувањето од компанијата.
Н.Н.Ф.
