ПЛАТИ НИЗ ЕВРОПА: Каде нето заработката е поголема од бруто?

Главните причини за овие разлики се даноците и придонесите за социјално осигурување. Во некои земји, семејните додатоци имаат дополнително влијание.

Колку всушност останува од платата низ Европа? И што е тоа што ја намалува бруто заработката?

Одговорот првенствено зависи од тоа дали имате деца и дали вашиот партнер исто така има приход. Во многу земји, ова може да ви овозможи да добиете надоместоци или поврат на данок. Еуроњуз анализираше три типични сценарија за 2024 година.

Податоците се базираат на лице кое заработува 100 отсто од просечната национална плата. За оние со повисоки или пониски приходи, соодносот помеѓу бруто и нето приходот се менува.

Нето заработката значи она што едно лице или домаќинство го задржува откако ќе се одбијат даноците и придонесите од бруто износот, и ќе се додадат сите семејни додатоци, објави Б92.

1. Слободен/а без деца

Според податоците на Евростат за 2024 година, просечното самохрано лице без деца во ЕУ задржува 68,6 oтсто од својата бруто заработка. Ако просечната плата во земјата е 1.000 евра, тоа значи дека едно лице задржува 686 евра, додека 314 евра одат за даноци и придонеси.

Во анализа на 31 земја (ЕУ + Швајцарија, Норвешка, Исланд, Турција), нето приходите во однос на бруто се движат од само 60,3 отсто во Белгија до 84,4 отсто во Кипар.

Следните имаат најмала задржана сума пари (под 66 отсто):

Белгија, Литванија, Германија, Романија, Данска, Словенија и Унгарија.

Највисока нето заработка (над 75 отсто) е забележана во следниве земји:

Кипар, Швајцарија, Естонија, Чешка, Бугарија, Шпанија, Шведска, Словачка, Полска и Португалија.

Франција има стапка од 71,9 отсто, а Италија 69,6 отсто.

2. Семејство со еден вработен и две деца

За двојки со деца каде што работи само едно лице, нето-приходот може значително да се зголеми. Просекот во ЕУ е 82,6 отсто, со опсег од 70,4 отсто во Романија до дури 107,1 отсто во Словачка, каде што, благодарение на детските додатоци и „негативниот данок“, нето-заработката е поголема од бруто-заработката.

Земји со највисока нето заработка во овој модел:

Словачка, Полска, Швајцарија, Чешка, Луксембург и Португалија (сите над 90 отсто).

Најмалите промени се забележани во:

Турција, Грција, Кипар, Финска, Норвешка и Шведска.

3. Брачна двојка со две деца, каде двајцата родители се вработени

Просечната нето заработка во овој модел е 73,6 отсто од бруто износот. Најниска е во Белгија (65,8 отсто), а највисока во Словачка (88,9 отсто).

foto Shutterstock/Vladyslav Starozhylov