ПЛАТА ЗА НОЕМВРИ: Околу 70.000 работници не ја добиле
Околу 70.000 работници не си ја земале платата што си ја заработиле.
Тоа значи дека 13 отсто од легално вработените на 16 декември не ја земале ноемвриската плата. Ова го покажуваат податоците на Управата за јавни приходи(УЈП). Во однос на бруто – плата за месец ноември 2024 година, 70,650 работодавачи имале обврска да исплатат плати и социјални придонеси за 552,030 вработени лица.
„Овој резултат покажува одговорност и посветеност на работодавачите со цел исполнување на даночните обврски на време, што има директен позитивен ефект и врз социјалната сигурност на работниците“, велат од УЈП.
Во законскиот рок до 16 декември, 49,911 или 71 отсто од работодавачите ја исполниле обврската и исплатиле бруто плати и социјални придонеси за 482,276 од вработените лица.
Ова значи дека за 87 отсто од вработените во државата социјалните придонеси се уплатени навремено.
