Петрушевски до Заев: Немам намера да се извинам, ти и должиш извинување на јавноста!
По најавата на поранешниот премиер Зоран Заев дека ќе поднесе тужба за клевета доколку ВМРО-ДПМНЕ не му се извини, пратеникот Бране Петрушевски возврати дека нема намера да упати извинување, туку очекува Заев да ѝ се извини на јавноста.
Петрушевски објави дека, според него, Заев треба да се извини „за сите милионски криминали што ги има правено и плус да се извини за сите национални предавства и понижувања“.
„Она што е индикативно во неговото излегување во јавноста е тоа што, иако демонтира и вели дека немал никаква врска со овој случај со марихуана, сепак во тоа негово писание, кажува дека ова било режирана драма и дека запленетата марихуана била наводно запленетата заради несоодветно чување и складирање, со што директно се става во одбрана на оние коишто се осомничени во овој случај. Дополнително, Зоран Заев треба да одговори на македонската јавност, затоа што имаше јавни сведоштва за тоа како гради зграда од 40 ката во Дубаи и она коешто треба да го каже, е дали и тој како Венко Филипче ќе оперира, па затоа добил златна виза за Дубаи. Оваа нервоза на Зоран Заев е само доказ дека клопчето се размотува, дека обрачот околу Заеви се стега и дека наскоро ќе има правда во Македонија. ВМРО-ДПМНЕ продолжува со борбата против криминалот и корупцијата во Македонија“, објави Петрушевски.
