Петрушева од БИРН: Медиумите се најдобриот партнер и првиот чекор до информирање на јавноста
Директорката на Балканската истражувачка репортерска мрежа (БИРН) Ана Петрушева, вчера беше обучувачка на последниот модул од програмата
„Future is Feminist“ кадешто говореше и ги едуцираше учесничките за основните алатки и канали на односите со јавноста, како да стигнат до
клучната порака, до целната публика, на кој начин да информираат за новостите во своето работење, но и зошто се важни односите со медиумите. Таа истакна дека медиумите се најдобриот партнер и првиот чекор до информирање на јавноста.
Во делот на алатките и каналите, учесничките низ интерактивни вежби учеа како да напишат соопштение за јавноста. Петрушева информираше
дека соопштение се испраќа кога има нешто ново да и се каже на јавноста, да се најави нешто што треба да се случи наскоро, да се промовираат резултати, презентира став, да се најави кампања. Таа потенцираше дека најважната порака треба да биде на почетокот и да дава одговор на петте прашања: кој, што, кога, каде, како, но и зошто. Текстот во соопштението треба да биде краток и лесен за читање поддржан со факти, да привлече внимание и најважно, да биде примен и разбран од целната публика.
За одржување на прес-конференции и изјави, Петрушева посочи дека не е доволно што ќе кажете, туку како ќе го кажете.
„Најважните пораки кажете ги јасно, со едноставен јазик, на аргументиран начин и задржете го вниманието на публиката. Бидете свесни дека зборувате со јавноста, а кога се подготвувате за прес-конференција, трудете се да размислувате како новинари. Користете зборови што публиката ќе ги разбере и внимавајте со артикулациите, висината на гласот, изговорот“, рече Петрушева.
Целта на програмата „Future is Feminist“ во организација на Фондацијата Фридрих Еберт и Асоцијацијата за инклузивен и одржлив развој СИГА е да се обучат девојките да ги зајакнат своите лидерски вештини за да го менуваат општеството на подобро.
