Пет лица загинаа, а повеќе од 400 се повредени во Сирија по новите земјотреси

Пет лица загинаа во неколку сириски градови по денешните земјотреси, јавија арапските ТВ станици, цитирани од ТАСС.

Според ТВ Ал Арабија, четири лица загинале во паниката и стампедото што се случи по земјотресите во градовите Алепо и Тартус. Уште една жена, според телевизијата „Скај њуз – Арабија“, починала во пристанишниот град Латакија.

Најмалку 470 луѓе се повредени по новите земјотреси во регионот, од кои 150 се во северозападниот дел на Сирија под контрола на бунтовниците, јави ДПА, повикувајќи се на Сириската опсерваторија за човекови права (SOHR).

Невладината организација известува дека речиси 320 од ранетите се во областите под контрола на сириската влада, главно во Алепо.

Земјотрес во кој загинаа најмалку три лица вчера се случи и во Турција.