„Кучињата го влечеа детето 200 метри“: Вујкото на искасаното дете од Битола демантира дека чувале глутница
Самедин Канановски, вујкото на двегодишното дете кое беше брутално нападнато од кучиња во битолската населба Баир, ги отфрли шпекулациите дека семејството ги одгледувало кучињата. Тој потврди дека детето е во тешка здравствена состојба на скопските клиники, а нападот го извршила глутница кучиња без чип.
Инцидентот се случил додека детето си играло во сопствениот двор.
Канановски остро реагираше на соопштението од прифатилиштето „Хачико“, во кое се алудираше дека кучињата биле „маалски“ и одгледувани од месното население.
Семејството прстот го вперува кон Општина Битола, обвинувајќи ја за негрижа кон проблемот со бездомните животни кои се присутни низ целиот град.
Според процедурите, нападите од бездомни кучиња треба да се пријават во Секторот за инспекциски работи во локалната самоуправа или до надлежното прифатилиште, кое потоа го известува официјалниот ветеринар.
