Пет компании се пријавиja за изградба на гасоводот во Македонија до Грција
Пет компании се пријавиле на меѓународниот повик за изградба на македонскиот дел од гасоводот преку границата со Грција. Тендерот беше објавен на 24 ноември лани, а крајниот рок за пријавување заврши на 1 февруари годинава.
– На повикот се пријавени вкупно пет заинтересирани страни, од кои 4 странски и една домашна, ни одговорија од инвеститорот, кој во случајов е акционерското друштво во државна сопственост „Номагас“.
Иако првично беше првично проценето проектот да чини 57,8 милиони евра, во меѓувреме во енергетската и воената криза се зголеми проектираната сума на 83 653 000 евра.
Неофицијално, повеќето компании доставиле пониска сума од проектираната. Од „Номагас“ ни одговорија дека ќе биде потребно време за да се одбере најповолната понуда, затоа што документацијата е обемна.
„Евалуацијата веќе е започната и е во тек, но нема конкретен рок бидејќи понудите се многу волуминозни и секако дека рокот ќе зависи од тоа дали ќе треба да се бара објаснување за одредени прашања. Треба да се напомене дека целата постапка е во согласност со правилата на Европската Инвестициона Банка, и извештајот од евалуација ќе се прати на одобрување кај нив. Но, секако дека заедно со конултантите се прават сите напори за да се убрза целата постапка, бидејќи проектот е од исклучително и стратешка важност за државата“, велат од „Номагас“.
Интерконекторот кон јужниот сосед на нашата земја треба да ѝ обезбеди посигурно снабдување со природен гас, како и диверзификација на изворите од каде Македонија досега го набавуваше гасот, односно руски „Газпром“. Единствената прекугранична гасоводна врска што ја има Македонија во моментов е со Бугарија.
Идниот гасовод меѓу Македонија и Грција е со должина од 123 километри и ќе се гради на потегот од Неготино преку Гевгелија до Неа Месимвриа во Грција. На овој начин, во иднина би се обезбедила алтернативна врска за обезбедување на природен гас од идниот ЛНГ-терминал во Грција, како и од гасоводот ТАП кој од Азербејџан преку Турција носи природен гас кон Европа.
„Ако оди се според планот, и ако имаме прифатлива понуда , до крајот на март треба да почне изградбата“, очекуваат од „Номагас“. Од таму додаваат дека не очекуваат надворешни опструкции на процесот бидејќи станува збор за стратешки интерес на пошироката енергетска заедница.
Претходно министерот за економија, Крешник Бектеши, рече дека низ гасоводот ќе се пренесува и водород, затоа што во иднина државата планира да овозможи изградба на две водородни централи за производство на електрична енергија.
– Имајќи предвид дека сме при крај од изградбата на новиот интерконктор заедно со Република Грција кој треба да го зголеми капацитетот во државава во делот на снабдување со природен гас, но и со можност во иднина да можеме да пренесеме и водород, посочува министерот, почнавме и постапка за изградба на нови капацитети за производство на електрична енергија, рече Бектеши пред две недели.
А.К.
