Пеп има четири желби за летово, ама Сити треба да му најде – скоро пола милијарда евра?!
Како што објавува новиот медиум „Релево“ од Шпанија, формиран од екс-новинари на „Марка“ и „АС“, кормиларот на англискиот шампион сака сериозна реконструкција зашто во најава се низа заминувања, ама прашањето дали е реално сѐ да купи.
На листата на желби се дефанзивецот Јошко Гвардиол, најдобриот млад стопер и член на РБ Лајпциг, проценет на најмалку 120 милиони евра, втор е Џуд Белингам, суперталентот на Борусија Дортмунд за кого „милионерите“ не седнуваат на преговори за иста сума како Гвардиол – 120 милиони евра.
На листата е и португалската ѕвезда Рафаел Леао, фудбалерот на Милан, за кој уште летоска Сити сакаше да го купи, а офанзивецот не е достапен за помалку од 100 милиони евра. И четвртиот е англискиот репрезентативен дефанзивен играч за врска – Деклан Рајс. И за него, сто милиони е цената од која Вест Хем не се откажува, особено што и Челси, Арсенал и Манчестер јунајтед се заинтересирани, па дополнително таа цена расте.
Оваа четворка што ја сака Гвардиола е влог за скоро деценија за Сити, според богатството на шеиците и не е нереално да бидат купени, само сѐ доаѓа во лош момент, кога Сити е под тужба за трансфер-малверзации и се соочува дури и со исфрлање од Премиерлигата.
Единствениот фудбалер кој бил на листата на Пеп, а веќе е недостапен е Камада кој веќе се договори со Ајнтрахт Франкфурт.
