Пензионери од Свети Николе ја блокираа улицата „Кочо Рацин“ – бараат линеарно покачување!
Пензионерите од Свети Николе денеска продолжија со протестите и побараа повторно од Владата да им се зголемат линеарно пензиите за 3.500 денари, бидејќи како што велат, со ниските пензии одвај преживуваат.
Трајче Станојков, член на организациониот одбор за протести вели дека денеска и наредните денови се до 20 септември ќе ја блокираат улицата „Кочо Рацин“ во Свети Николе, со цел да го свртат вниманието на своите сограѓани, но и на локалната и централната власт.
-Се собравме овде и ќе ја сопираме улицата „Кочо Рацин“ во времетраење од еден час, за да им покажаме овде на нашата јавност и на вашата публика дека не престануваме со барањето за покачување на нашата пензија. Сакам да кажам дека овде на улица сме веќе еден месец срам е за нашата држава да ние како возрасни луѓе од 65 години па нагоре ги искажуваме нашите барања на улица, наместо да се разбереме на еден современ начин, вели Станојков.
Блокадите продолжуваат и наредните денови се до 20 септември, кога најавија дека ќе има генерален штрајк во Скопје.
